ಗಿಡ

ನಾನೆಟ್ಟ ಸಸಿ ಬೆಳೆದು,
ಹಸಿರೊಡೆದು ಗಿಡವಾಗಿ,
ನೂರೆಂಟು ಚಿಗುರೊಡೆದು,
ತಂಪೆರೆವ ಮರವಾಗಿ,
ಮೊಗ್ಗರಳಿ ಹೂವಾಗಿ,
ಮಿಡಿಕಚ್ಚಿ ಕಾಯಾಗಿ,
ಹಣ್ಣಾಗಿ ಸವಿಯುಣುವ
ಭಾಗ್ಯವೆನಗಿಲ್ಲ
ಬರ ಸಿಡಿಲಿನ ಹೊಡೆತಕ್ಕೆ
ಮರವೊರಗಿತಲ್ಲ.

ಓ ಮನಸೆ

ಎಲ್ಲಿರುವೆ ಓ ಮನಸೆ
ಕಾದಿರುವೆ ನಿನ್ನ
ಬಾ ಬೇಗ ಬಳಿಬಂದು
ತಬ್ಬಿಕೋ ನನ್ನ

ಬರಡಾದ ಮನದಲ್ಲಿ
ಪ್ರೀತಿ ಝರಿ ಚಿಮ್ಮಿಸಿ
ಉತ್ಸಾಹದ ಚಿಲುಮೆಯನು
ನನ್ನಲ್ಲಿ ಉಕ್ಕಿಸಿ

ನನ್ನನೊಬ್ಬನೆ ಬಿಟ್ಟು
ನೀ ದೂರ ಹೋದೆ
ಜೊತೆಯಾರೂ ಇಲ್ಲದೆ
ನಾ ಒಬ್ಬಂಟಿಯಾದೆ

ಕಲ್ಲನೆಸೆದು ನೀರನು
ನಾ ಕದಡಲಿಲ್ಲ
ನನ್ನೋಡಲ ಶಾಂತಿಯನು
ಕದಡಿರುವೆಯಲ್ಲ

ನಿನ್ನಿಂದ ಎನನ್ನೂ
ನಾ ಬಯಸಲಿಲ್ಲ
ನೀ ನನ್ನ ಜೋತೆಯಾಗು
ಈ ಜನ್ಮವೆಲ್ಲಾ

ನಿನ್ನ ನೆನಪಲಿ ಹಲವು
ಮಾಸಗಳು ಕಳೆದಿಹುದು
ನೀನನ್ನ ಸೇರುವ
ಆಸೆ ಬದುಕುಳಿದಿಹುದು

ಒಂಟಿ ಮರ

ನಗದಿರಿ ಹಸಿರುಹೊತ್ತ ಮರಗಳೇ
ಬೆತ್ತಲಾದ ನನ್ನ ನೋಡಿ
ನಾನೂ ನಿಮ್ಮಂತೆಯೇ ಇದ್ದೆ
ಮೈತುಂಬ ಹಸಿರು ಇತ್ತು
ಮಡಿಲ ತುಂಬ ಹಣ್ಣು ಕಾಯಿ
ತುಂಬಿ ತುಂಬಿ ತುಳುಕುತಿತ್ತು
ಹಲವು ಹಕ್ಕಿಪಿಕ್ಕಿಗಳಿಗೆ
ನನ್ನ ರೆಂಬೆ ಮನೆಯಾಗಿತ್ತು

ಕಳೆದುಕೊಂಡೆ ಎಲ್ಲವನ್ನೂ
ಬಂದು ಬಳಗ ಗೆಳೆಯರನ್ನು
ಹಾಡಿನಲಿವ ಹಕ್ಕಿಗಳನು
ಹಸಿರು ಹೊರುವ ರೆಂಬೆಗಳನು
ನೆಲದೊಲಿಳಿದ ಬೇರುಗಳನು
ಮತ್ತೆ ಬೆಳೆವ ಶಕ್ತಿಯನ್ನೂ.

ನಡುಗಡ್ಡೆ

ಸುತ್ತುವರಿದ ನೀರ ನಡುವೆ
ಮುಳುಗಿ ಉಳಿದ ನೆಲದ ಮೇಲೆ

ಒಣಗಿನಿಂತ ಕೊರಲು ಕುಂಟೆ
ಅಳಿದು ಉಳಿದ ಹಸಿರ ಉಸಿರು

ಹೇಳುತಿಹುದೇ ತನ್ನ ಕಥೆಯ?
ನಾವರಿಯದ ಒಡಲ ವ್ಯಥೆಯ.

ಜನಕೆ ಬೆಳಕು ನೀಡಲೆಂದು
ತನ್ನ ಜೀವ ಒತ್ತೆ ಇಟ್ಟು

ಮುಳುಗಿ ಸತ್ತ ಬಂಧುಗಳನು
ನೆನೆಯುತಿಹುದೆ ಕಣ್ಣೀರಿಟ್ಟು..?

ಮಾರ್ಕೆಟು

ಏರುತಿಹುದು ಬೀಳುತಿಹುದು ನೋಡು ನಮ್ಮಯ ಮಾರ್ಕೆಟು
ಹೇಳುತಿಹುದು ಮತ್ತೆಮತ್ತೆ ಆರ್ಥಿಕತೆಯ ತಟಪಟ
ಬೇರು ಬುಲ್ಲು ತಿಂದು ಕೊಬ್ಬಿ ಮತ್ತೆ ಅಡ್ಡ ಮಲಗಿವೆ
ದುಡ್ಡು ಹಾಕಿ ಡಬ್ಬಲ್ ಮಾಡುವ ಆಸೆ ಇನ್ನೂ ಉಳಿದಿದೆ

(ಏರುತಿಹುದು ಹಾರುತಿಹುದು ನೋಡು ನಮ್ಮ ಬಾವುಟ ..)

ಜಾಗಿಂಗ್ ಮಾಡ್ಬೇಕಂತೆ

ದಿನಾ ತಲೆ ತಿಂತಾಳೆ
ವಾಕಿಂಗ್ ಹೋಗು ಅಂತ
ಹೊಟ್ಟೆ ಕಮ್ಮಿ ಆಗ್ಬೇಕಾದ್ರೆ
ಜಾಗಿಂಗ್ ಮಾಡ್ಬೇಕಂತೆ

ನಾಲ್ಕು ಮಾರೂ ನಡಿಯೋದಿಲ್ಲ
ಮೈ ತುಂಬಾ ಬೊಜ್ಜು
ಕೂತು ಕೂತು ಆಗ್ತಿದ್ದೀಯ
ಎಮ್ಮೆಯಂತೆ ದಪ್ಪ

ಯೋಗ ಗೀಗ ಮಾಡಿ ಸ್ವಲ್ಪ
ವೈಟು ಕಮ್ಮಿ ಮಾಡಿ
ಇಲ್ಲ ಅಂದ್ರೆ ಆಗ್ತೀವಿ ನಾವು
ಆನೆ ಆಡಿನ ಜೋಡಿ

ಓಹೋ ನೀನೆ ನನ್ನ
ಆನೆ ಅಂತೀಯೇನು
ಕನ್ನಡಿಲಿ ಒಮ್ಮೆ ನೋಡು
ನೀನೇನ್ಕಮ್ಮಿಯೇನು

ಜಾಗಿಂಗ್ ವಾಕಿಂಗ್ ಎಲ್ಲಾ ಮಾಡಿ
ತೆಳ್ಳಗಾದವ್ರ್ಯಾರು
ದಿನಾ ವಾಕಿಂಗ್ ಮಾಡೋ ಆನೆ
ವೈಟು ಗೊತ್ತಿಲ್ವೇನು

ಓಟ
ಎಲ್ಲಿನೋಡಿದರಲ್ಲಿ
ಓಡುತಿವೆ ಆಸೆಗಳು
ನನ್ನೊಡನೆ ಒಂದಾಗಿ
ಓಡಲು ಕಲಿತವು

ಅದೂ ಸಾಲದೆಂಬಂತೆ
ನಿನ್ನೆ ಮೊನ್ನೆಯ ಮರಿಗಳು
ಶರವೇಗದಿಂದಲಿ
ಓಡುತಿಹವು

ಹಿಂದೆ ನೋಡಿದರಲ್ಲಿ
ಪರಿಚಿತರು ಯನಗಿಲ್ಲ
ಮುಂದೆ ಓಡುವರಾರೂ
ಹಿಂತಿರುಗಿ ನೋಡಿಲ್ಲ

ನಿಟ್ಟುಸಿರ ಬಿಡಲೆಂದು
ಕ್ಷಣಕಾಲ ನಾ ನಿಂತೆ
ಆಯಿತೆ ಅದು ನನಗೆ
ಬಂಧಿಸುವ ಸಂಕೋಲೆ

ಉಡುಗಿತೇ ನನ್ನಲ್ಲಿ
ಸಾಧಿಸುವ ಛಲ
ಉಳಿದೀತೆ ಗುರಿ ಮುಟ್ಟಿ
ಗೆಲ್ಲುವ ಬಲ

ಎನೇ ಆದರು ಸರಿಯೇ
ಓಡಲೇ ಬೇಕು
ಮುಂದೋಡಿದವರ
ಜೋತೆಗೂಡಬೇಕು

ದಿನಾಚರಣೆ


ಪ್ರೀತಿಯ ಆಚರಣೆಗೆ
ದಿನವೊಂದು ಬೇಕೇಂದರೆ
ನಿತ್ಯದ ಉಸಿರಾಟಕ್ಕೆ
ಆಚರಣೆಯಿಲ್ಲವೇಕೆ..?

ಅಭಿವೃದ್ಧಿ

ಗ್ರಾಮಾಭಿವೃದ್ಧಿಯ
ಯೋಜನೆಗಳನ್ನು ಮಂಡಿಸಿದರು   
ಮೇಜು ಕುಟ್ಟಿ
ಸಭಿಕರು ಸ್ವಾಗತಿಸಿದರು
ಚಪ್ಪಳೆ ತಟ್ಟಿ
ಮರುದಿನ ಸೇರಿತದು
ಕಸದ ಬುಟ್ಟಿ

ಮೌನ

ಮಾತುಗಳು ಸೋತಾಗ
ಮೌನ ಮಾತಾಡಿತು
ಮಾತುಗಳ ಪರಿಮಿತಿಯ
ಮೀರಿ ಮಾತಾಡಿತು

ದಿನ ನಿತ್ಯದ ಲೋಕದಲಿ
ಮಾತುಗಳೆ ಮುಂದು
ಗಾದೆ ತಾ ಹೇಳುವುದು
ಜಗಳವಿಲ್ಲದಕೆಂದು

ಮನದ ಡುಗುಡವ
ಬಿಚ್ಚಿ ಹೇಳುವುದೆ ಮಾತು?
ಪದಪುಂಜ ಬರಿದಾಗಿ
ಮುದುಡುವುದು ಸೋತು

ಆ ದುಗುಡ ಬಿಂಬಿಸಲು
ಮಾತೇಕೆ ಬೇಕು?
ಕ್ಷಣ ಮೌನ ನಿಟ್ಟುಸಿರು
ಕಂಬನಿಯೇ ಸಾಕು.

ಮಾತುಗಳು ಬಡಿಯುವುಡು
ಕಿವಿಯ ತಮಟೆಗಳನ್ನು
ಮೌನವು ತಟ್ಟುವುದು
ಹೃದಯದ ಕದಗಳನ್ನು

ಭೋರ್ಗರೆವ ಕಡಲಿನ
ಅಲೆಯಂತೆ ಮಾತು
ತಣ್ಣನೆ ಹರಿಯುವ
ಜಲದಂತೆ ಮೌನ

ಕಡಲಿನಲೆಗಳ ಹೊಡೆತಕ್ಕೆ
ಒಡೆಯುವುದು ಕಲ್ಲು
ಹರಿವ ನೀರಿನ ಒಲುಮೆಗೆ
ಕರಗುವುದು ಕಲ್ಲು

ವ್ಯವಹಾರಿಕ ಲೋಕದಲಿ
ಮಾತುಗಳೆ ಶಕ್ತಿ
ಭಾವನಾ ಲೋಕದಲಿ
ಮೌನವೇ ಭಕ್ತಿ

ಪಾಡು
ಎನೋ ತಳಮಳ
ಎನೋ ಕಳವಳ
ಎನೋ ಮರೆತಂತೆ
ಎನೋ ಕಳ ಕೊಂಡಂತೆ
ಎಲ್ಲರ ಮೇಲೂ ಕೋಪ
ಎಲ್ಲರಿಗೂ ಹಿಡಿ ಶಾಪ
ಇದು ಎಲ್ಲರ ಪಾಡು
ಭಾನುವಾರದ ಸಂಜೆಯ ಹಾಡು.

ದೋಸ್ತಿ ಸರಕಾರ

ನಾಯಕರುಗಳ ಅರಮನೆಗಳಲ್ಲಿ
ರಾಜಭವನದ ಅಂಗಳಗಳಲ್ಲಿ
ಅಂಕೆ ಸಂಖ್ಯೆಗಳ ಸಮೀಕರಣದಲ್ಲಿ
ಶಾಸ್ತ್ರ ಪಂಡಿತರೆ ಪಂಚಾಂಗಗಳಲ್ಲಿ
ಕುಣಿದು ಕುಪ್ಪಳಿಸುತ್ತಿತ್ತು
ದೋಸ್ತಿ ಸರಕಾರ
ಬಳಲಿ ಬೆಂಡಾಗಿದ್ದ ಮತದಾರ

ನಿನ್ನೆ ರಾತ್ರಿ ಬೆಂಗ್ಳೂರ್ನಲ್ಲಿ
ಟ್ರಾಫಿಕ್ ಕಡಿಮೆ ಇತ್ತು,

ಯಾಕಂದ್ರೆ ಟಿವಿಯಲ್ಲಿ
ಕ್ರಿಕೆಟ್ ಮ್ಯಾಚಿತ್ತು।

ಹಗಲೂ ರಾತ್ರಿ ಕೆಲಸ ಮಾಡಿ
ಪ್ರಾಜೆಕ್ಟ್ ಮೇಲೆ ಪ್ರಾಜೆಕ್ಟ್ ಮಾಡಿ
ಪ್ರಾಜೆಕ್ಟ್ ಮ್ಯಾನೆಜರ್ ಆಗೋದರಲ್ಲಿ
ಮುದುಕ ಆಗಿದ್ದ
ಅದಕ್ಕೆ
"Man + age ರ್"

ನಾಯಿಗೆ ಬಲಿ


ಮನೆಯನು ಕಾಯುವ ನಿಷ್ಠೆಯ ಸೇವಕ
ಆಗಿರುವನೇಕೆ ಎಳೆಯರ ಅಂತಕ

ಧಾಳಿಗೆ ಸಿಕ್ಕಿದ ಜನಗಳು ಹಲವು
ಜೀವವ ತ್ಯಜಿಸಿದ ಕುಡಿಗಳು ಕೆಲವು

ಏತಕೆ ನಾಯಿಗೆ ಈ ಪರಿ ರೋಷ
ಜನರನು ಕಚ್ಚಿ ಕೊಲ್ಲುವ ದ್ವೇಷ

ನೋಡಿರಬಹುದೆ ಶ್ವಾನ ಪ್ರದರ್ಶನ
ಧನಿಕರ ಮಾಡುವ ಧನ ಪ್ರದರ್ಶನ

ಷೋಕಿಗೆ ಸಾಕಿದ ನಾಯಿಯ ಗತ್ತು
ಅಲೆದರೂ ದೊರೆಯದ ಕೂಳಿನ ತುತ್ತು

ಅನಿಸಿರ ಬಹುದು ಅವರೇಕೆ ಹೆಚ್ಚು
ಹುಟ್ಟಿರಬಹುದು ಸಮಾನತೆಯ ಕಿಚ್ಚು

ಮುಂದೆ..
ಹಣದ
ಚೆಲ್ಲಾಟ,
ಓಟಿಗಾಗಿ
ಪರದಾಟ
ಹಿಂದೆ..?
ಪರದೆ
ಹಿಂದೆ
ಆಟ

World Cup

ಲಂಕೆಯನ್ನು ಸುಟ್ಟ
ಹನುಮಂತ
ಬಾಲದಿಂದ
ಬಾಲ ಸುಟ್ಟರು
ಲಂಕನ್ನರು ತಮ್ಮ
Ball ನಿಂದ

ಹೊರಗೆ ಬೇಸಿಗೆಯ
ಬಿಸಿ
ಒಳಗೆ ಕೊರೆವ
ಛಳಿ
ನಮ್ಮ ಆಫೀಸಿನ
ಎ.ಸಿ.

ಯುಗಾದಿ

ಹೊಸ ವರ್ಷದ
ಹೊಸ ಬಾಳಿಗೆ
ಹಾಡಲೆಂದು
ನಾಂದಿ,
ನೆಲೆಕಾಣದ
ಬರಡು ಬದುಕಿಗೆ
ತೋರಲೆಂದು
ಹಾದಿ
ಭರದಿಂದಲಿ
ಬರುತಲಿದೆ
ಭರವಸೆಗಳ ಹೊತ್ತು
ಯುಗಾದಿ

WeekEnd

ಅತೀ ಕೆಲಸದಿಂದ
ಆಗದಿರಲಿ
ವೀಕ್ ಎಂದು
ಬಂದಿದೆ ಈಗ
ವೀಕೆಂಡು

ಆಸೆ

ಅವಳ ಆಸೆ ಏನೆಂದರೆ
ನಾನು ನಗಬೇಕಂತೆ
ನಾನು, ನಗ ಬೇಕಂತೆ

ನಾಯಿ

ಬೀದಿ ನಾಯಿಗಳಿಗಾಗಿ
ಹಾಕಬೇಡಿ ಕಣ್ಣೀರು
ಸುರಕ್ಷಿತವಾಗಿರಲಿ
ನಮ್ಮೆಲ್ಲರ ಚಿಣ್ಣರು

ಯುಗಾದಿ

ಮಾಲ್ ಗಳಲ್ಲಿ
ಭಾರಿ ಕಡಿತದ
ಮಾರಾಟ
ಬಾರ್ ಗಳಲ್ಲಿ
ಭಾರಿ ಕುಡಿತದ
ತೂರಾಟ

ತೂಕಡಿಕೆ

ಕೂತು ಉಂಡರೆ ಸಾಲದು
ಹೊನ್ನ ಕುಡಿಕೆ,
ಉಂಡ ಮೇಲೆ
ತೂಕಡಿಕೆ.

ಬಿಂಬ

ನಾನಿನ್ನ ಮೆಚ್ಚಿದೆ
ರೂಪದಿಂದಲ್ಲ,
ನಾನಿನ್ನ ಬಯಸಿದೆ
ಬಯಕೆಯಿಂದಲ್ಲ

ನನ್ನ ಒಳ ಮನಸಿನೊಳಗೆ
ಬಿಂಬ ಒಂದಿತ್ತು
ಬೆರಗಾದೆ ಆ ಬಿಂಬ
ನೀನೇ ಆಗಿತ್ತು.

ವಿವಾದ

ಏರಿದ ಕಾವಿಗೆ
ನಗರವೇ ಉರಿದಿದೆ
ಭುಗಿಲೆದ್ದ ಹಿಂಸೆಗೆ
ರಣರಂಗವಾಗಿದೆ
ಯಾರದೋ ಏಟಿಗೆ
ಯಾರದೋ ರಕ್ತ
ನೀರಾಗಿ ಹರಿದಿದೆ.

ನಗರ

ಬೆಳೆದಿದೆ ಎಷ್ಟು
ಬೆಂಗಳೂರು ನಗರಿ
ಓಡಾಡಲೂ ಇಲ್ಲಿ
ಜಾಗ ಇಲ್ಲಾರಿ

ದಿನಕ್ಕೊಂದೆರಡು
ಹೊಸಾ ಲೇಔಟು
ಗಗನಕ್ಕೆರಿದೆ
ರಿಯಲ್ ಎಸ್ಟೇಟು

ರಸ್ತೆ ರಿಪೇರಿ
ಮಾಡೋರಿಲ್ಲ
ಟ್ರಾಫಿಕ್ ಗೋಳು
ಕೇಳೋರಿಲ್ಲ

ಹೊಗೆಯನೇ ಕುಡಿಯುತ
ಬದುಕುವರಿಲ್ಲಿ
ಶುದ್ದ ಗಾಳಿಯು
ದೊರಕದು ಇಲ್ಲಿ

ಪಕ್ಕದ ಬೀದಿಯ
ನೋಡೇ ಇಲ್ಲ
ನೆರೆಮನೆಯವರ
ಪರಿಚಯವಿಲ್ಲ

ಮಾನವ ಮೌಲ್ಯಕೆ
ಬೆಲೆಯೇ ಇಲ್ಲ
ದುಡ್ಡೇ ದೊಡ್ಡದು
ಎನ್ನುವರೆಲ್ಲ.

ಚಳಿಯ ಕರೆ

ಗಡ ಗಡ ನಡುಗಿದೆ ಎದೆ
ಕರುಣೆಯಿಲ್ಲದ ಚಳಿಗೆ
ಕೂಗಿ ಕರೆಯುತಿದೆ ನಿನ್ನ
ಬರಲಾರೆಯಾ ಬಳಿಗೆ...?

ಮಾಗಿಯ ಚಳಿಯು
ಮುಗಿಯುವ ತನಕ
ಮುಗಿಯದು ನಲ್ಲೆಯ
ಕಾಯುವ ತವಕ

ಕಳೆದ ದಿನಗಳು

ಮರೆಯಲಾರೆ ಆ ದಿನಗಳ,
ಕಳೆದು ಹೋದ ಸವಿ ನೆನಪುಗಳ.

ಸೈಕಲ್ಲಿಂದ ಬಿದ್ದ ಗಾಯಗಳ
ಮೇಸ್ಟ್ರಿಂದ ತಿಂದ ಹೊಡೆತಗಳ.

ಹತ್ತಿಳಿದ ಮರಗಳ
ಓಡಾಡಿದ ರಸ್ತೆಗಳ.

ಗೆಳೆಯರ ಒಡನಾಟ
ಒಟ್ಟಾಗಿ ಕಲಿತ ಪಾಠ.

ಹಿರಿಯರ ನುಡಿ ಮುತ್ತು,
ಕಿರಿಯರ ಸವಿ ಮಾತು.

ಅಂದು

ವಾರದ ಮೊದಲ ದಿನದಂದು
ಬೆಳಗಿನ ಘಂಟೆ ಏಳಾಗಿತ್ತು,
ಮಾಗಿಯ ಚಳಿಯ ಅಬ್ಬರವು
ಇಬ್ಬನಿಯೊಂದಿಗೆ ಮೇಳೈಸಿತ್ತು.

ಸೂರ್ಯನೂ ಮೋಡದ ಅಪ್ಪುಗೆಯಲ್ಲಿ
ಲೋಕವ ಬೆಳಗಲು ಮರೆತಿದ್ದ,
ಚಂದಿರನಂತೂ ಚಳಿಗೆ ಹೆದರಿ
ಬೆಚ್ಚನೆ ಹೊದ್ದು ಮಲಗಿದ್ದ.

ಕೆಲಸದ ಕರೆಯು ಕರೆಯುತಲಿದ್ದರೂ
ಹಾಸಿಗೆ ಬಿಡುವುದು ತರವಲ್ಲ,
ಇನ್ನೂ ಸ್ವಲ್ಪ ಮಲಗಿಯೇ ಬಿಡುವೆ
ತಡವಾಗಿ ಹೋದರೆ ಆಯ್ತಲ್ಲಾ.

ಹೊದಿಕೆಯ ಎಳೆದು ಮಲಗಿಯೇ ಬಿಟ್ಟೆ
ತಕ್ಷಣ ನಿದ್ದೆಯು ಬಂದಿತ್ತು,
ಎಚ್ಚರವಾಯ್ತು ಕಣ್ಣನು ಬಿಟ್ಟೆ
ಎಲ್ಲೆಲ್ಲೂ ಬೆಳಕು ತುಂಬಿತ್ತು.

ಸೂರ್ಯನು ಮೇಲೆ ಬಂದಿರಬೇಕು
ಸಣ್ಣನೆ ಬಿಸಿಲು ಬಂದಿತ್ತು,
ಅಯ್ಯೋ ಮರೆತೆ ಉಳಿಸಿದ ಕೆಲಸ
ಇಂದೇ ಮುಗಿಸ ಬೇಕಿತ್ತು.

ಸ್ನಾನವ ಸಂಜೆ ಮಾಡಿದರಾಯ್ತು
ಸಮಯವ ಕಳೆವುದು ಬೇಕಿಲ್ಲ,
ಬೇಗನೆ ಹೋಗಿ ಕೆಲಸ ಮುಗಿಸುವೆ
ಉಳಿಸುವುದೆಂದೂ ಸರಿಯಲ್ಲ.

ಪಯಣಿಗ

ನಾನೊಂದು ದೋಣಿಯ ಒಂಟಿ ಪಯಣಿಗನು,
ಗುರಿಯಿರದೆ ಶರಧಿಯಲಿ ತೇಲುತಿಹೆನು.
ಅಲೆಗಳ ಎತ್ತರವು ಮುಗಿಲು ಮುಟ್ಟಿಹುದು,
ಮಳೆಗಾಳಿ ರಭಸಕ್ಕೆ ಮನವು ನಡುಗಿಹುದು.
ಈ ದೋಣಿ ನೀರಿನಲಿ ಮುಳುಗದಿರಲಿ,
ಬಿರುಗಾಳಿ ಅಲೆಸುಳಿಗೆ ಸಿಲುಕದಿರಲಿ.
ದಡವ ತೋರಿಸಿ ನನ್ನ ಕೈಹಿಡಿದು ನಡೆಸು,
ಎಂದೆಂದು ನೀ ನನ್ನ ಮನದಲ್ಲಿ ನೆಲೆಸು.

ಎಂದು.?

ಮುತ್ತಿದಾ ಕಾರ್ಮೋಡ ಕರಗುವುದು ಎಂದು.?
ಮುತ್ತಿನಾ ಮಳೆನೀರು ಹರಿಯುವುದು ಎಂದು.?
ಬತ್ತಿದಾ ಕೆರೆತೊರೆಗಳುಕ್ಕುವುದು ಎಂದು.?
ಬರಡಾದ ಒಣ ಭೂಮಿ ಹಸಿರಾಗುವುದೆಂದು.?
ಬಾಡಿದಾ ಬಾಳಿನಲಿ ಚಿಗುರೊಡೆಯುವುದೆಂದು.?
ಆ ದಿನದ ಬರವಿನಲಿ ಕಾದಿರುವೆ ನಿಂದು.

ನಮ್ಮ L D

ಒಂದು ದಿನ L D ಸಂಜೆ
ನಮ್ಮನೆಗೆ ಬಂದಿದ್ದ,
ಎಂದಿನಂತೆ ಅಂದೂ ಅವ್ನು
Bike ತಂದಿದ್ದ.

ಛಳಿಯು ಜಾಸ್ತಿ ಅಂತ ಅವ್ನು
ಮರೆತೇ ಬಿಟ್ಟಿದ್ದ,
ಅಂದೂ ಕೂಡಾ ಜರ್ಕಿನ್ನನ್ನು
ಬಿಟ್ಟು ಬಂದಿದ್ದ.

ರಾತ್ರಿಯೆಲ್ಲಾ ಕೂತು ನಮ್ ಜೊತೆ
ಹರಟೆ ಹೊಡೆದಿದ್ದ,
ಮಧ್ಯರಾತ್ರಿ ಆದ ಮೇಲೆ
ಮನೆಗೆ ಹೊರಟಿದ್ದ.

ಬೆಳಗಿನ ಝಾವ ಬಾವನ್ನ ಕರ್ಕಂಡು
Airport ಗೆ ಹೊಗಿದ್ದ,
ಬಾವನ್ನ Aeroplane ಹತ್ಸಿ
ವಾಪಾಸ್ ಹೊರ್ಟಿದ್ದ.

ದಾರಿಯಲ್ಲಿ ಛಳಿಯಾಗಿ
ಗಡ ಗಡ ನಡುಗಿದ್ದ,
ಸಿಕ್ಕ ಒಂದು Sumo ಜೊತೆ
Race ಮಾಡಿದ್ದ.

Sumo ದವ್ನು Brake ಹಾಕಿ
Right ಗೆ ತಿರ್ಗಿದ್ದ,
ಇವ್ನೂ ಗಟ್ಟಿ Brake ಹಾಕಿ
ಉರುಳಿ ಬಿದ್ದಿದ್ದ.

ಬಿದ್ದನಾದ್ರೂ ಪೆಟ್ಟೇ ಆಗ್ದೆ
ಎದ್ದು ನಿಂತಿದ್ದ,
ಮನೆಗೆ ಬಂದು ರಗ್ಗು ಹೊದ್ದು
ನಿದ್ದೆ ಮಾಡಿದ್ದ.

ಕಾಡುವ ನೆನಪುಗಳು ಮೂಡುವ ರವಿಯಂತೆ
ಸಮಯ ಕಳೆದಂತೆ ತೀಕ್ಷ್ಣ
ಆದರೆ
ಮುಳುಗಲಾರವೇಕೆ..?

ಕಲಿಕೆಯಲಿ ಇವರು ಏಕಲವ್ಯ್ರರೇ ಎಲ್ಲ.
ಕಲಿಸದೇ ಕಲಿಯುವರು ಕೆಟ್ಟ ಚಟಗಳನೆಲ್ಲಾ...

ಜೀವನ..

ನೆನಪುಗಳ ಕದತಟ್ಟಿ,
ಭಾವನೆಗಳ ಲೇಖನಿಯಲಿ,
ಮನಸಿನ ಪುಟಗಳ ಮೇಲೆ
ಬರೆದೊಂದು ಕವನ..
ಅದುವೇ ನಮ್ಮ ಜೀವನ..

ನಲ್ಲೆಯ ಒಲುಮೆಗೆ ಮಾಪಕ ಬೇಕೆ..?
ಕಣ್ಣಲಿ ತುಂಬಿದ ಪ್ರೀತಿಯೆ ಸಾಕೆ..?

ವಿರಹ

ನನ್ನೆದೆಯ ಕೋಟೆಯನು ಬೇಧಿಸಿ ನೀ ಬಂದೆ
ಬರಡಾದ ಬದುಕಲ್ಲಿ ಹೊಸ ಹಸಿರು ತಂದೆ
ನೀನಿತ್ತ ಈ ಪ್ರೀತಿ ನಾ ಮರೆಯಲಾರೆ
ಅರೆ ಕ್ಷಣವೂ ವಿರಹವನು ನಾ ತಾಳಲಾರೆ.

ದ್ವಾಪರದ ದುರ್ಯೊಧನನೂ ಬೆವರಿದ್ದನಂತೆ ನೀರಿನಲಿ ಭೀಮನ ದನಿ ಕೇಳಿ..
ಕಲಿಯುಗದ Software Engineer ಬೆವರಿದಂತೆ ಏಸಿ ರೂಮಿನಲಿ P.M. ದನಿ ಕೇಳಿ.
Deadlineನೇ ಇದಕೆಲ್ಲಾ ಕಾರಣ..

ಮನಸು..

ಮನಸೆಂಬ ದೋಣಿಯ ಪಯಣಿಗನು ನಾನು
ನೆನಪೆಂಬ ಬಿರುಗಾಳಿ ಬೀಸದಿರು ನೀನು.
ಸವಿಸುಖದ ಕಹಿನೆನಪ ಮರೆತಿಹೆನು ನಾನು
ತಿಳಿಯಾದ ಎದೆಗೊಳವ ಕಲುಕದಿರು ನೀನು.

ಎಂದು ಬರುವೆ..?

ನನ್ನವಳ ಬಣ್ಣಿಸಲು ಶಬ್ದಗಳೇ ಸಾಲದು
ಬಣ್ಣಿಸದೆ ಹೋದರೆ ಮನಸು ತಾ ಕೇಳದು

ಆ ಕಣ್ಣ ನೋಟಕ್ಕೆ ಸೋಲದವರಾರು
ಕಣ್ಣಂಚ ಮಿಂಚಿಗೆ ಹೆದರಿತು ಮುಂಗಾರು.

ಮುಂಗುರುಳು ನಲಿದಿತ್ತು ತಂಗಾಳಿ ಕರೆಗೆ
ಬೆರಗಾಗಿ ನೋಡಿತ್ತು ನವಿಲು ಆ ಪರಿಗೆ.

ಕೆಂದುಟಿಯ ಕಿರು ನಗೆಗೆ ಸರಿಸಾಟಿಯೆಲ್ಲಿ
ಜೇನು ತುಂಬಿದ ಹೂವು ಬಾಗಿಹುದು ಇಲ್ಲಿ.

ನಾಸಿಕವು ಸಂಪಿಗೆಯು ನಾಚುವಂತೆ
ಆಗಸದ ತಾರೆಯೇ ನೊತ್ತಿನಂತೆ.

ಕೊಗಿಲೆಯ ಇನಿದನಿಯು ಕೊರಳಿನೊಳಗೆ
ಹಂಸದಾ ಹೋಲಿಕೆಯು ನಡಿಗೆಯೊಳಗೆ.

ನೀಳ ಜಡೆಯನು ಹೊತ್ತ ಇವಳೇ ಫಣಿವೇಣಿ
ನನ್ನೆದೆಯ ರಾಜ್ಯಕ್ಕೆ ನೀನೇ ಮಹಾರಾಣಿ.

ಮನದ ಬಾಗಿಲು ತೆರೆದು ಕಾಯುತ್ತಲಿರುವೆ
ಓ ನನ್ನ ಮನದನ್ನೆ ಎಂದು ನೀ ಬರುವೆ..?

ಅಂದು..
ಅಂದು ಅವಳು ನಕ್ಕಾಗ..
ಮಳೆಬಿಲ್ಲು,ಹೂಮಳೆ.
ಇಂದು
ಹೊರೆ Bill ಜಡಿ ಮಳೆ.

ಆಸೆ..

ಸಿಡಿಲನು ಕಾರುವ ಬಿರುಮಳೆಗಂಜದೆ ಮುನ್ನೆಡೆಯುವ ಆಸೆ..
ಹೊಗೆಯನು ಕಾರುವ ಟ್ರಾಫಿಕ್ ಗೆ ಸಿಕ್ಕದೆ ಬೇಗ ಮನೆಸೇರುವಾಸೆ...

Software

ಎಲ್ಲಾ ಹುಡುಗೆಗೂ ಬೇಕು
Software ಗಂಡ
ಇದೇನಿದು...
Software ಗಂಡಾ..?

City

ನಾಗರೀಕ: ನಮ್ಮಿಂದ ಬೆಳೆದಿದೆ Bangalore City.
ಇಂಜಿನಿಯರ್: ನಮ್ಮಿಂದ ಬೆಳೆದಿದೆ Electronic City.
ಕುಡುಕ : ನಮ್ಮಿಂದ ಬೆಳೆಯುತಿದೆ UB City.

ಒಂದು ಸಿನಿಮಾ ಕಥೆ...

ಕೆಲಸವಿಲ್ಲದ ಬಡಗಿ ಏನೊ ಮಾಡಿದ್ನಡ.. ಹಂಗಾತು ಅವತ್ತು. ಮಳೆ ಬರ್ತಿತ್ತು.. ಒಳ್ಳೆ ಛಳಿ ಬೆರೆ ಇತ್ತು.. ಸುಮ್ನೆ ಮನೆಲಿ ಕಂಬಳಿ ಹೊದ್ದು ಮಲ್ಗದು ಬಿಟ್ಟು ಹಿರೇತನ ಮಾಡ್ಕ್ಯಂಡು ಸಿನಿಮಾ ನೊಡಕ್ಕೆ ಹೊದ್ಯ ಅಂತಾತು.ಅದೂ ಯಾವ್ದು.."ಉಮ್ರಾವೊ ಜಾನ್".

ಮಳೆ ಸಣ್ಣಗೆ ಬರ್ತಿತ್ತು, ಜಾಕೆಟ್, ಹೆಲ್ಮೆಟ್ ಹಾಕ್ಯಂಡು ಕಾಮಾಕ್ಯ ಥಿಯೇಟರ್ ಹತ್ರ ಹೊದ್ಯ. ಅಲ್ಲೇ ಪಕ್ಕದ ಹೊಟಲ್ಲಗೆ ಲೈಟಾಗಿ ಊಟ ಮಾಡಿದ್ಯ. ಸಿನಿಮಕ್ಕೆ ಜನ ಜಾಸ್ತಿಯೇನು ಬಂದಿರ್ಲೆ. ಅವಾಗ್ಲೆ ಹೇಳಿದಿ ಎಲ್.ಡಿಗೆ.. ಇವತ್ತೊಂದು ಕೆಟ್ಟ ಸಿನಿಮಾ ನೊಡ ಸೀನ್ ಇದ್ದು ಅಂತ. ಸರಿ ಅಲ್ಲಿವರೆಗೆ ಬಂದಮೇಲೆ ಯೋಚನೆ ಮಾಡದೆಂತು ಅಂತ ಒಳಗೆ ಹೊದ್ಯ. ಅವಾಗ್ಲೆ ಸಿನಿಮಾ ಶುರುವಾಗಿತ್ತು. ಒಳಗೆಲ್ಲಾ ಖಾಲಿ ಇತ್ತು.ಒಳ್ಳೆ ಸೀಟು ಹುಡುಕಕ್ಕೆ ಶುರು ಮಾಡಿದ್ರೆ ಸಿಗಹೊತ್ತಿಗೆ ಸಿನಿಮಾ ಮುಗಿತು ಅಂತ ಸಿಕ್ಕಿದ ಸೀಟಲ್ಲೇ ಕೂತ್ಕಂಡ್ಯ. ಸಿನಿಮಾ ಶುರುವಾಗಿತ್ತು.. ಆದ್ರೂ ಐಶ್ವರ್ಯ ಒಡ್ಡೊಲಗ ಆಗಲ್ಲೆ ಇನ್ನೂ ಅಂತ ಸಮಾಧಾನ ಮಾಡ್ಕ್ಯಂಡು ಕುಂತ್ಯ. ಕಥೆ ಈಗ ಶುರುವಾಗ್ತು..ಈಗ ಶುರುವಾಗ್ತು.. ಅಂತ ಕಾದಿದ್ದೆ ಬಂತು.. ಯಂತದೂ ಗೊತ್ತಾಗದಿಲ್ಲೆ.. ಅದೆನು ಹಿಂದಿನೊ.. ಉರ್ದುನೊ.. ಏನೂ ತಿಳಿಯಲ್ಲೆ..ಐಶ್ವರ್ಯ ಡ್ಯಾನ್ಸ್ ಮಾಡಕ್ಕೆ ಶುರು ಮಾಡಿದ. ತಗಳ್ಳಪ್ಪ.. ಹಾಡು ಶುರುವಾತು. ಏನು ಹಾಡು.. ಏನು ಡ್ಯಾನ್ಸು ಏನು ಕಥೆ..ತಲೆ ಬುಡ ತಿಳಿಯಲ್ಲೆ...ಹೊಗ್ಲಿ ನಿದ್ದೆನಾದ್ರು ಮಾಡನ ಅಂದ್ರೆ ಸೀಟು ಸರಿಯಿಲ್ಲೆ..ಅಂತೂ ಇಂತೂ ಹೊದ ತಪ್ಪಿಗೆ ಪೂರ್ತಿ ಸಿನಿಮಾ ನೊಡಿ ತಲೆ ಕೆಟ್ಟು.. ಮನೆಗೆ ಬರಹೊತ್ತಿಗೆ 12:30 ಆಗಿತ್ತು. ಇನ್ನು ಯಾವತ್ತೂ ಯಾವುದೆ ಸಿನಿಮಕ್ಕೆ ಫಸ್ಟ್ ಡೇ ಹೊಗಲಾಗ ಅಂತ ತೀರ್ಮಾನ ಮಾಡಿ ಮಲ್ಗಿದ್ಯ.

Film: Umravo Jaan
Date:03:11:2006 9:30 PM
Place:ಕಾಮಾಕ್ಯ

Members:
Me (Bava)
Harsha
Suhas
L D (Ganesh)
Thomas (Vishwa Rao)